त्यस्तै, भारतीय चलचित्र ‘रामायणा: द राइज अफ लेजेन्ड’ ले पनि नेपाली बक्स अफिसमा उत्कृष्ट व्यापार गरिरहेको छ। अर्कोतर्फ नेपाली चलचित्र ‘आबाटा आमा २’ र ‘कबड्डी ५: आफ्टर द फाइनल म्याच’ ले पनि आफ्नो प्रदर्शन यात्रा सफलतापूर्वक अगाडि बढाइरहेका छन्।
यता हरिवंश आचार्य, जितु नेपाललगायतका कलाकारहरूको अभिनय रहेको चलचित्र ‘पाँच पाण्डव’ भने बक्स अफिसमा अपेक्षाकृत कमजोर देखिएको छ। आज हामी यी पाँच चलचित्रको बक्स अफिस कलेक्सन, प्रदर्शन अवधि, प्राप्त शो र व्यापारिक अवस्थाबारे चर्चा गर्दैछौँ। १. बाटुलो जुनको बक्स अफिस कलेक्सन
अभिनेता अनमोल केसी स्टारर चलचित्र ‘बाटुलो जुन’ ले नेपाली बक्स अफिसमा धमाकेदार सुरुवात गरेको छ। भुवन केसीको निर्देशनमा तयार भएको यस लभ स्टोरी ड्रामा चलचित्रमा अनमोल केसीसँगै गरिमा पन्त, प्रिन्सी खतिवडा, न्यान्सी खड्का, प्रकाश घिमिरे, लक्ष्मी गिरीलगायतका कलाकारहरूको अभिनय रहेको छ।
सनराज पिक्चर्स र भविष्य फिल्मको ब्यानरमा निर्माण भएको चलचित्रमा जिया केसी र भविष्य खड्काको लगानी रहेको छ।
चलचित्रले प्रदर्शनको पहिलो दिन देशभरका मल्टिप्लेक्समा १८९ भन्दा बढी शो प्राप्त गरेको थियो। सिंगल स्क्रिनसमेत जोड्दा चलचित्रले २६५ भन्दा बढी शो पाएको थियो।
पहिलो दिनमै चलचित्रले करिब १ करोड ५३ लाख रुपैयाँको आक्रामक ओपनिङ गरेको निर्माण पक्षको जानकारी छ।
दोस्रो दिन पनि चलचित्रको क्रेज उत्तिकै देखिएको छ। दोस्रो दिन चलचित्रले मल्टिप्लेक्समा २०३ भन्दा बढी शो प्राप्त गरेको थियो। सिंगल स्क्रिनसमेत जोड्दा चलचित्रको शो संख्या अझै बढेको थियो।
प्राप्त विवरणअनुसार दोस्रो दिन चलचित्रले करिब १ करोड ३० लाख रुपैयाँभन्दा बढी व्यापार गर्ने अनुमान गरिएको छ। यससँगै सुरुवाती दुई दिनमै चलचित्रको कुल व्यापार करिब २ करोड ८० लाख रुपैयाँभन्दा माथि पुग्ने देखिएको छ।
शनिबार र आइतबारको बिदाका कारण चलचित्रको व्यापार अझै बढ्ने अपेक्षा गरिएको छ। यही गति कायम रहेमा ‘बाटुलो जुन’ पहिलो हप्तामै १० करोड क्लबमा प्रवेश गर्न सक्ने सम्भावना देखिएको छ। २. रामायणा: द राइज अफ लेजेन्डको बक्स अफिस कलेक्सन
नेपाली बक्स अफिसमा उत्कृष्ट व्यापार गरिरहेको भारतीय चलचित्र ‘रामायणा: द राइज अफ लेजेन्ड’ ले पनि दर्शकको राम्रो साथ पाइरहेको छ।
नितेश तिवारीको निर्देशनमा तयार भएको यस चलचित्रमा रणवीर कपुर, साई पल्लवी, सनी देओल र रवि दुबेलगायतका कलाकारहरूको अभिनय रहेको छ।
वाल्मीकि रामायणमा आधारित यस चलचित्रलाई नेपालमा एप्पल इन्टरटेनमेन्टले वितरण गरेको हो।
चलचित्रले नेपालमा पहिलो दिनदेखि नै ठूलो संख्यामा शो प्राप्त गरेको थियो। प्रदर्शनको आठौँ दिनसम्म आइपुग्दा नेपालमा करिब ४ लाख ६ हजार टिकट बिक्री गर्दै १६ करोड रुपैयाँ हाराहारीको व्यापार गरेको विवरण सार्वजनिक भएको छ।
नवौँ दिन पनि चलचित्रले नेपालका मल्टिप्लेक्सहरूमा २८५ भन्दा बढी शो प्राप्त गरेको बताइएको छ। आजको व्यापारसमेत जोड्दा नेपाली बजारमा चलचित्रको कमाई अझै बढ्ने देखिएको छ।
विश्वव्यापी बक्स अफिसमा समेत चलचित्रले उत्कृष्ट प्रदर्शन गरिरहेको छ। उपलब्ध प्रारम्भिक विवरणअनुसार चलचित्रले आठ दिनमा विश्वभर करिब १,०५४ करोड भारु ग्रस कलेक्सन गरेको छ। नवौँ दिनको प्रारम्भिक अनुमानित कमाईसमेत जोड्दा यसको विश्वव्यापी व्यापार करिब १,१२५ करोड भारु पुग्ने देखिएको छ। ३. आबा आमा २ को बक्स अफिस कलेक्सन
चन्द्र पन्तको निर्देशनमा तयार भएको पारिवारिक कथामा आधारित चलचित्र ‘आबा आमा २’ ले पनि बक्स अफिसमा राम्रो प्रदर्शन गरिरहेको छ।
चलचित्रमा बल शाह, विपना थापा, प्रदीप राउत, आकाश श्रेष्ठ, साइग्रेस पोखरेल, मलिका महत, निकिता आचार्य, रिस्ता गुरुङ, नरेन खड्कालगायतका कलाकारहरूको अभिनय रहेको छ।
आर्या इन्टरटेनमेन्टको ब्यानरमा निर्माण भएको यस चलचित्रमा आर्या पन्तको लगानी रहेको छ।
प्रदर्शनको सुरुवाती दिनदेखि नै दर्शकको साथ पाएको चलचित्रले २८ दिन अर्थात् चार हप्तासम्ममा करिब ६ करोड ८५ लाख ९ हजार ८०० रुपैयाँको व्यापार गरेको विवरण प्राप्त भएको छ।
प्रदर्शनको २९औँ दिन चलचित्रले सुरुवातमा पाँच शो प्राप्त गरे पनि एउटा शो रद्द भएपछि चार शो मात्र सञ्चालनमा आएका थिए।
आज प्राप्त चार शोबाट चलचित्रले करिब ५३ हजार ५५० रुपैयाँको व्यापार गरेको बताइएको छ।
यससँगै चलचित्रले आफ्नो लगानीको तुलनामा उत्कृष्ट व्यापार गर्दै बक्स अफिसमा सुपरहिट प्रदर्शन कायम गरेको छ। ४. कबड्डी ५: आफ्टर द फाइनल म्याचको बक्स अफिस कलेक्सन
रामबाबु गुरुङको लेखन तथा निर्देशनमा तयार भएको कमेडी ड्रामा चलचित्र ‘कबड्डी ५: आफ्टर द फाइनल म्याच’ ले पनि नेपाली बक्स अफिसमा राम्रो व्यापार गरिरहेको छ।
चलचित्रमा दयाहाङ राई, गौमाया गुरुङ, सन बिक्रम राई, बुद्धि तामाङ, पशुपति राईलगायतका कलाकारहरूको अभिनय रहेको छ।
बाँसुरी फिल्म्सको ब्यानरमा निर्माण भएको यस चलचित्रलाई श्री वेंकटेश इन्टरटेनमेन्ट र द टी फल्क फिल्म्सले वितरण गरेका हुन्।
प्रदर्शनको पहिलो दिन कार्तिक ६ गते चलचित्रले देशभरका मल्टिप्लेक्समा २२४ शो प्राप्त गरेको थियो।
प्रदर्शनको तीन हप्ता अर्थात् २१ दिनसम्ममा चलचित्रले करिब १२ करोड १५ हजार रुपैयाँभन्दा बढीको व्यापार गरेको विवरण प्राप्त भएको छ।
२२औँ दिन चलचित्रले १७ शो प्राप्त गरेको थियो। सीमित शोका बाबजुद पनि दर्शकको राम्रो उपस्थिति देखिँदा चलचित्रले आज करिब ५ लाख १५ हजार रुपैयाँभन्दा बढीको व्यापार गरेको बताइएको छ।
यससँगै ‘कबड्डी ५’ पनि नेपाली बक्स अफिसमा सुपरहिट चलचित्रका रूपमा स्थापित भएको छ। ५. पाँच पाण्डवको बक्स अफिस कलेक्सन
वसन्त निरौलाको निर्देशनमा तयार भएको कमेडी ड्रामा चलचित्र ‘पाँच पाण्डव’ ले भने बक्स अफिसमा अपेक्षाकृत कमजोर प्रदर्शन गरिरहेको छ।
सुशील पौडेलको लेखन रहेको यस चलचित्रमा हरिवंश आचार्य, जितु नेपाल, आर्यन सिग्देल, महेश त्रिपाठी, सुशील सिटौला, दीपाश्री निरौला, इवा गिरी, सरिता गिरी र प्रशान्त ताम्राकारलगायतका कलाकारहरूको अभिनय रहेको छ।
नवीन श्रेष्ठको प्रस्तुतिमा कालीरानी फिल्म्सको ब्यानरमा निर्माण भएको यस चलचित्रमा कालीरानी श्रेष्ठको लगानी रहेको छ।
आरआर फिल्म्सले वितरण गरेको चलचित्रले प्रदर्शनको पहिलो दिन देशभर ९५ शो प्राप्त गरेको थियो।
तर प्रदर्शनको आठौँ दिनसम्म आइपुग्दा चलचित्रको शो संख्या घटेर जम्मा पाँचमा सीमित भएको छ।
प्रदर्शनको पहिलो सातासम्ममा चलचित्रले करिब ३९ लाख ९० हजार रुपैयाँको व्यापार गरेको विवरण प्राप्त भएको थियो। आठौँ दिन प्राप्त पाँच शोबाट चलचित्रले करिब ६२ हजार १०० रुपैयाँको व्यापार गरेको बताइएको छ।
करिब तीन करोड रुपैयाँभन्दा बढी बजेटमा निर्माण भएको यस चलचित्रले अपेक्षित दर्शक पाउन नसक्दा बक्स अफिसमा कमजोर प्रदर्शन गरिरहेको छ।
आज बक्स अफिसमा कसले मार्यो बाजी?
आजको बक्स अफिस रिपोर्ट हेर्दा अनमोल केसी स्टारर ‘बाटुलो जुन’ ले सबैभन्दा बढी चर्चा बटुलेको देखिन्छ। प्रदर्शनको दोस्रो दिनमै करिब २ करोड ८० लाख रुपैयाँ हाराहारीको सुरुवाती व्यापार गर्दै चलचित्रले नेपाली बक्स अफिसमा आफ्नो बलियो उपस्थिति देखाएको छ। त्यस्तै ‘रामायणा: द राइज अफ लेजेन्ड’ ले नेपाली तथा अन्तर्राष्ट्रिय बजारमा उत्कृष्ट व्यापार गरिरहेको छ। ‘आबा आमा २’ र ‘कबड्डी ५’ ले आफ्नो प्रदर्शन यात्रामा शानदार सफलता हासिल गरेका छन् भने ‘पाँच पाण्डव’ ले भने अपेक्षित व्यापार गर्न सकेको छैन। तपाईंलाई यी पाँच चलचित्रमध्ये कुन चलचित्र सबैभन्दा राम्रो लाग्यो? कमेन्टमा आफ्नो विचार राख्नुहोला। नेपाली चलचित्र तथा दैनिक बक्स अफिस कलेक्सनका ताजा रिपोर्टका लागि हाम्रो वेबसाइट नियमित हेर्दै गर्नुहोस्।





